Changan, Huawei və CATL şirkətlərinin birgə layihəsi olan Avatr brendinin yeni modeli – 06T universal avtomobili nəhayət tam şəkildə ictimaiyyətə təqdim olundu. 2021-ci ildə qurulan bu Çin elektrik avtomobil brendinin dördüncü modeli olan 06 sedanından sonra gələn 06T universal, kuzov növü ilə yanaşı, bir sıra texniki fərqlərə də malikdir. Avatr 06T-nin ilkin satışlarına aprel ayının 8-dən başlanması planlaşdırılır.
Dizayn baxımından Avatr 06T universalının ön hissəsi sedanı xatırladır: iki zolaqlı gündüz hərəkət işıqları hər iki modeldə eynidir. Lakin ön bamperin tərtibatı güc aqreqatından asılı olaraq fərqlənir – daxili yanma mühərriki olan versiyada xrom dekor, elektromobil versiyasında isə aktiv hava girişləri nəzərdə tutulub. Avtomobilin damında reylinqlər, arxasında isə spoyler yerləşir. Ölçülər baxımından model 4940 mm uzunluğu, 1960 mm eni, 1475 mm hündürlüyü və 2940 mm təkər bazası ilə sedandan 85 mm uzun və 25 mm hündürdür.
Salona gəldikdə, Avatr 06T-nin interyeri sedandan götürülüb. Ön hissədə 15,6 düymlük mərkəzi ekran və ön panelin bütün eni boyu uzanan 35,4 düymlük geniş displey diqqəti cəlb edir. Üçqollu sükan demək olar ki, oval formadadır, mərkəzi dirsəkaltının yanında isə stəkan tutacaqları və simsiz smartfon şarj cihazı yerləşir. Arxa divan üç nəfərlik oturacaq təklif edir. Bundan əlavə, model ən son Huawei lidar texnologiyası və HarmonySpace 5 rəqəmsal kokpiti ilə təchiz olunacaq.
Elektrik versiyası arxa və tam ötürmə ilə təklif ediləcək. Arxa ötürmə variantında hər biri 341 at gücündə iki mühərrik, tam ötürmədə isə əlavə olaraq 286 at gücündə ön mühərrik qoşulur. 89,33 kVt/saatlıq batareya Çinin CLTC standartına görə 740 kilometrdən artıq yürüş ehtiyatı təmin edir. Hibrid versiyada isə 1,5 litrlik 156 at gücündə turbomühərrik generator kimi fəaliyyət göstərir, 45,06 kVt/saatlıq batareya isə sırf elektrik enerjisi ilə 330 km məsafə qət etməyə imkan verir.
Avatr 06T universalının qiyməti hələlik açıqlanmayıb. Müqayisə üçün qeyd edək ki, 06 sedanının qiyməti 209.900 ilə 279.900 yuan arasında, yəni təxminən 30.500–40.700 dollar arasında dəyişir. Əlavə detalların yaxın zamanlarda açıqlanması gözlənilir. Avatr 06T, elektrik avtomobili bazarında güclü rəqabət yaratmağa hazırlaşan ciddi bir model kimi diqqəti cəlb edir.
📰 Mənbə: autograph.az
